يحدث في تونس: عون بمسرح صفاقس يقطع عرض محمد علي كمون ويطرد الجمهور “على خاطر يحب يروح! “

كشفت الناشطة خديجة معالج، اليوم الأحد 17 افريل 2022، تفاصيل إيقاف عرض الفنان “24 عطر” للفنان محمد علي كمّون بصفاقس.

وقالت في تدوينة مطوّلة على حسابها الرسمي “فيسبوك”: “في بلاد الزبلة و الخمج، ناس عاطية من جهدها و من وقتها ومن جيوبها باش تحاول تزيين بلادها وادخل شوية فرحة في قلوب الناس بالفن و الثقافة و اتبدل من حالنا و اتخرج تصويرة مزيانة…

ناس تؤمن إلي الفن بجميع أنواعوا هي الوسيلة الوحيدة للارتقاء وللوعي. وكي انقولو وعي انقولو قدر أساسه إحترام و مواطنة.

قدر للفنانين، قدر للعازفين، قدر للجمهور، وقدر للناس إلي تعبت، قدر للشعب الكريم الي ننتمي ليه و إحترام ليه و احنا مكونات الأساسية متاعوا بالرجوع لمفهوم المواطنة.

تو إجا نفهموا شنوة صار البارحة خلال عرض “24 عطر” للفنان محمد علي كمون والمنظم من طرف جمعية النهاوند بالمسرح البلدي بصفاقس:

1. صحيح العرض طوّل شوية و هذا خاطر الجمهور اتفاعل مع الفنانين و طلب زيادة مقطع الي هيا حاجة عادية في إدارة العروض، تتسمى” RAPPEL PUBLIC DE L’ARTISTE”

2.صحيح صار وقتك و انتي ربي اعينك موظف لدى الجماعات المحلية، تعكعك من جيوبنا،

لكن ثم لكن، معندكش الحق تشعل الضوء على الجمهور و تحكم على:

1. الفنان يوقف العرض مع العلم الي مزالو 5 دقائق على خاتمة العرض، قلت خاتمة على خاطر عرض “24 عطر” عرض تونسي بامتياز للأستاذ محمد علي كمون قيمة فنية دولية معترف بيها يحكي حكاية فيها مقدمة و جوهر و خاتمة، يحكي على تونس الفن،
2. تهدد بقصان الكهرباء على العازفين و تجبر الفنان باش يوقف العرض بالسيف، وتشعل الضوء على الجمهور بمعنى برا روحوا، هذا إسمو جهل و قرافة وإستبداد وكل ما لا يتعلق بالفن و الثقافة،
3. جمهور خلص فلوس من حقوا يكمل يحضر العرض الي شراها، كيف تشري تذكرة حقك اتكمل اتفرهيدة امتاعك،

خسارة، خسارة، خسارة،… فرحة العودة للمسرح البلدي بصفاقس مررتها…

هذي مخلفات: أمورنا فسفس و زغرد يا انشراح و البرستيج و سيستام طاح أرجع غدوة و الزبلة و الخمج و الهم و الهم و الهم الي ارضينا بيه و كرهتونا في روحنا

تو يلزم المحاسبة ثم العقاب، نقطة و ارجع للسطر.”