في رسالة مؤثرة لابنة الصحفي صالح عطية: ”بابا الغالي صحيح انتي تحبها تونس وتموت عليها أما خسارة هي ما حبتكش” !!

دوّنت كريمة الصحفي والإعلامي صالح عطية رسالة إلى من يهّمه الأمر طالبت فيها بإطلاق سراح والده المحتجز من 23 يوما.
وشدّدت سندس عطية في تدوينتها على أن والدها أحب تونس ويتغزّل يوميا بها، لكنها أحست أن تونس لم تحبه بالقدر المتبادل.

يذكر أنه تم إيقاف الصحفي صالح عطية على خلفية تصريحاته على قناة الجزيرة حين قال أن رئيس الجمهورية قيس سعيّد قد يكون أمر الجيش الوطني بإغلاق مقرات اتحاد الشغل وإيقاف قياداته إلا أنهم رفضوا ذلك وأبلغوا قيادة المنظمة الشغيلة بالأمر.

وفي ما يلي نص التدوينة:

23 يوم إعتقال وقمع وظلم
يزي عاد فيه البركة حرمتونا منو بما فيه الكفاية وأكثر
حرمتونا من ضحكتو
حرمتونا من التفدليك متاعو
حرمتونا من كلامه الباهي اللي يهزلنا بيه المورال
حرمتونا من وجهه البشوش
بابا صاحب جو برشا
بابا فدلاك لدرجة موش عادية
بابا يحب الناس الكل
بابا انسان مسامح لدرجة ما ينجم يتخيلها حد
بابا ينحي من فمو ويعطي
بابا يمد يديه للناس الكل حتى اللي يعرفهم ما يحبوهش
بابا ما يخليها بحد
بابا حنين بصفة غريبة
بابا عمرو مايشد البغض على حد
بابا يحب ديما يضحك ويضحك اللي بحذاه
بابا يحب عائلته برشا، يحب أولادو برشا، يحب أصحابو برشا، يحب حتى الناس اللي ما تحبوش ويعمل معاهم الخير وكي نجي نقلو كيفاش يقلي عيش بنتي عند ربي خير
بابا يحب خدمتو ويتفنن فيها وحريص عليها

والأهم من هذا الكل بابا يحب تونس برشا ويعشقها لدرجة تخلي الانسان باهت وهو يتغزل بيها
“بابا الغالي صحيح انتي تحبها وتموت عليها أما خسارة هي ما حبتكش”
حسبي الله ونعم الوكيل في اللي حرمنا منك
الحريةللسجينصالحعطية سيبصالح
لاللمحاكماتالعسكرية