طارق ساخرا من جامعة كرة اليد المغربية: كيفاش تنسحب من حاجة مش مشارك فيها (فيديو)

علق طارق الكحلاوي كرونيكور برنامج في 90 دقيقة على إي أف أم، اليوم الثلاثاء 30 أوت 2022، على بلاغ الجامعة المغربية لكرة اليد التي أعلنت فيه انسحابها من البطولة العربية لكرة اليد للأندية الأبطال التي ستحتضنها تونس.

وقال الكحلاوي:” كيفاش تنسحب من حاجة مش مبرمج بش تشارك فيها… يعني هنا دخلنا في مستوى منحط متاع بروباغندا ما قبل التاريخ … المهم غذي الإعلام متاعك المغربي بحاجة ضد تونس، رانا شادة عليك السماء لا تطيح راني مش بش نجيك لكرة اليد لكرة السلة لكرة الطائرة، راهو العمدة متاع ما نعرفش قرية ما نعرفش وين راهو خرج برقية يندد فيها بالرئيس قيس سعيد، جريدة درا شنية في كذا هبطت مقال ناري ضد كذا، ويبداو كي اللي عرفت حاجة تغذي حاجة ونقعد محافظ على حالة متاع تشنج،

أنا متأكد أن ليس كل المغرب كذلك ومتأكد حتى ليس كل الوسط الرسمي المغربي كذلك، حتى ليس كل الوسط متاع وزارة الخارجية والوسط الإعلامي المغربي كذلك وعندي عديد الأصدقاء الجامعيين خاصة في المغرب وأتواصل معهم بشكل متواتر أنو مش هذاكا رايهم ويدعيوا كيما قلنا لحلحلة الأزمة ولتخفيف التوتر وعدم تصعيد التشنج، فما الموجة معروفة في الأزمات الدبلوماسية متاع عام ككح،

نتذكر في الثمانينات وقت الأزمة مع القذافي، الحاجة يتذكرها في الثمانينات يلزم تعفين وتضخيم الأزمة مش فقط تولي أزمة دبلوماسية وسحب السفراء، لا طردلو الخدامة متاعو وقتها القذافي طرد خدامة معروفة كان يعملها حتى مع المغرب وقتها، تعفين الأزمة الأسلوب القديم الفوضوي ما قبل التاريخ متاع أنك والله نحب نخلي أمور متاع تشنج وضغط للأقصى،

فما واضح توجه مغربي عموما لرد الفعل المبالغ فيه، ولت البارح بوريل متاع المفوضية الأوروبية، عمل تصريح عادي جدا قال نحن بالنسبة لينا السياسة الرسمية للاتحاد الأوروبي هو ترك القرار للصحراويين، شنوة هو قرار الأمم المتحدة اللي مالتسعينات لتوة ما اتطبقش واللي موافقين عليه الطرفين البوليساريو والمملكة المغربية هو أنو يصير استفتاء، معناها الأطراف اللي تسكن غادي تبقى تنظيم الاستفتاء وشكون يشارك فيه وشكون مقيم غادي وشكون جاي مالبرة، شنوة اللي صار بعد تصريح متاع بوريل اللي عاود كرر فيه الموقف المعروف التقليدي المعلن متاع السياسة الخارجية الأوروبية صارت حملة وكان بش يصير لقاء بين وزير الخارجية المغربي وبوريل وتم إلغاء اللقاء والزيارة يعني فما هالأسلوب متاع رد الفعل المبالغ فيه ما نعرفش هل هو حاجة منظمة استراتيجية وإلا ناتجة على توتر في مسائل أخرى”.